Ultimate magazine theme for WordPress.

منذ 38 عامًا تم العثور على جثة الطالبة كارين رينج في مدخل بيتها 

0

 كتب: محمود فخر الدين

الموضوع كان صادم جدًا لأسرتها و المحيطين بيها . خصوصًا إنها طالبة متفوقة و بنت هادية مش بتاعة مشاكل . و هنا برضه بفتكر جملة للدكتور أحمد خالد توفيق قال فيها “إن تتوقع ان يعاملك العالم برفق لأنك شخص طيب اشبه بأن تتوقع إلا يلتهمك الأسد لأنك شخص نباتي لا تأكل اللحوم”. والمصايب بتحصل للناس العادية اللي ماشيين في حالهم عادي يعني مش شرط يعملوا سبرينتات في طريق الجريمة عشان يتبهدلوا !

المهم البوليس جه لقيوا جثة البنت مرمية في مدخل البيت ملابسها ممزقة بما يوحي إن في اعتداء جنسي حصل . و حلقها مذبوح و شويه طعنات كده .

المهم نقلوا الجثه على المشرحة و رفعوا الأدلة من مسرح الجريمة هوب دابيل كيك قدروا يوصلوا للقاتل عن طريق بصماته اللي تقريبًا كان راششها في مسرح الجريمة و لا كأنه سبوع و بيرش الملح سبع مرات.

القاتل كان دافيد ستيفان بياع سريح من اللي بيخبط على الباب و هو شايل شنطة كبيرة على ظهره و يسأل بانجليزي مكسر ” اندك اروسه ؟ اندي جهاز اروسه ”

اتقبض عليه و اعترف انه شاف كارين حلوه و كبرت في دماغه يغتصبها و يسرقها بس لما قاومته قتلها . و بعد القتل سرق اللي سرقه و هرب.

في المحكمة دافيد اعترف إنه سرق كارين و قتلها لكن ما اغتصبهاش ! القاضي قاله يا ابني مش هتفرق مش هنديك جايزة الدولة التقديرية لأفضل حرامي قاتل السنه دي عشان ما اغتصبتهاش ! دافيد قاله سعادة القاضي طلاق تلاته ما حصل انا سرقت و قتلت لكن ما اغتصبتش !

دي كانت معضله حقيقيه لأن تقرير الطب الشرعي قال إن كارين تم اغتصابها فا ليه بينكر ؟ المحقق أخد دافيد على جنب و قاله احنا شباب زي بعض و قول انك اغتصبتها انت كده كده ميت .

ديفيد مد ايه و قاله هات كفك …. و شبكه العشره الكرام دول انا ما اغتصبتها ! انا فعلا حاولت لكن مقاومتها كانت عنيفه خلتني اقتلها و اسرق و اهرب !

المحقق قاله اخبط دماغك في الحيط بقي ! و الأدله كلها ضدك و بالفعل اتحكم عليه بالاعدام .

القضية اتقفلت ؟

هل أبدو لك كشخص يقدم قضية بالسهولة دي ؟

مرت سنين و ظهر تحليل الحمض النووي “ DNA” و اخد مكانه و سمعه انه التحليل الادق في التحقيقات الجنائية . وقتها ديفيد عمل استئناف و طلب تحليل حمض نووي للسوائل اللي لقيوها علي جسم كارين .

و هنا كانت المفاجأه ….. مش بالنسبة لك و لا بالنسبة لي طبعا لكن للمحققين و اهل كارين …. ان ديفيد فعلا ما اغتصبهاش !

ديفيد بكى و قال انا ربنا نصرني . انا سرقت و قتلت لكن اغتصاب ؟ ليه هو انا كافر !

أمال مين اللي اغتصبها ؟

بالبحث في قاعده البيانات لقيوا في تطابق بين العينه دي و بين شخص اسمه كينيث دوجلاس شغال في مشرحة الشرطة في ولاية اوهايو . العينة بتاعته موجوده في قاعده البيانات عشان اتقبض عليه في حادث سواقه و هو سكران .

اتقبض علي كينيث اللي بعد شويه مراوغه منه علي شويه عدم استيعاب من المحققين ان اللي في دماغهم ده حقيقي اعترف انه اه انا اغتصبت جثتها ! و مش بس كده ! ابو دوجلاس انهارده بيضحي و اعترف انه في خلال فتره شغله من ١٩٧٦ لغايه ١٩٩٢ لما تقبض عليه اغتصب فوق ال ١٠٠ جثه و هو سكران او تحت تأثير المخدرات .

اعتراف كينيث بقي كان صدمة حقيقية . و هنا لازم اتفق إن الصدمة كانت من نصيبي أنا كمان بقي ! الألم اللي اتعرضت له الأسرة أصبح مضاعف و جسم بنتهم تم انتهاكه بالقتل و الاغتصاب و التشريح ! لا و الولاية كلها كل من له واحده جثتها باتت ليله في المشرحه بقي علي يقين ان كينيث اعتدى عليها !

اللي قام بيه كينيث هو حالة من الحالات الموثقة في الطب النفسي كا انحراف جنسي اسمه ” نيكروفيليا ” و هي كلمة من اصل لاتيني معناها جماع الاموات ” بديهيات و الله مش هيبقي معناها باللاتيني زهور الربيع يعني “.

اختلف العلماء ايه اللي بيدفع الشخص لانه يمارس النكروفيليا …. كل واحد طلع فيهم رمي الانحراف ده علي ظروف بيئية و نفسية للشخص اللي بيقوم بالعمل ده . لكنهم اجتمعوا على إن الشخص اللي بيمارسها لازم يكون عنده قناعه انه مرفوض من الجنس الآخر و غير مقبول شكليًا و لا جسديًا . و بيعاني من عقد نقص فا بيمارس العلاقه مع جثه ما ياخدش منها تعليق سلبي عليه !

الحقيقة إن التفسير ده يعتبر الأصح لأن تقريبًا كل السفاحين اللي مارسوه كان عندهم مشاكل اجتماعية أو جنسيه تمنعهم من الاحساس بالقبول ! ده لا يمنع ان كان منهم اللي نرجسي بشكل مبالغ فيه و برضه مارس النكروفيليا. لكن التفسير هنا إن اللي بيمارسها ما بيبقاش عايز يسمع اي رد او تعليق …. و الجثث لا تتحدث زي ما انتم عارفين . و هنا بتكون النرجسيه هي غطاء لمشكلة عظيمة صاحبها عايش في الانكار و قرر يغتصب الجثث ايمانا بمبدأ انا مش قصير قزعه انا طويل و اهبل زي ما هنشوف في قصه السفاح الروسي اللي مش هقول اسمه عشان يبقي مفاجأه.

اه نسيت اقول لكم ان دايفيد القاتل بيقاوم حكم الاعدام و تقريبا كده هينفد منه بعد اثبات انه مش مغتصب . وسط غضب شديد من اسره كارين اللي شايفين انه لو ما تمش اعدامه هيبقي بيتكافئ فعلا علي قتل بنتهم ! و انه لولا قتلها ماكانش كينيث اغتصب جثتها….

شخصيًا مش مستغرب محاولات ديفيد في التمسك بالمؤبد بدل الإعدام . في الأول و الأخر دي غريزه البقاء … و لا مستغرب رفضه التام نسب تهمه ليه ما ارتكبهاش . علي الرغم إن اللي منعه من ارتكابها هو مقاومة الضحية ! اللي مستغربه الاعتراف السريع لكينيث اللي اول ما اتزنق في قضيه كارين اعترف علي نفسه في ١٠٠ قضية تانيه ماحدش عرف عنها حاجة.

منذ 38 عامًا تم العثور على جثة الطالبة كارين رينج في مدخل بيتها 

قد يعجبك ايضا

اترك تعليق

يرجي التسجيل لترك تعليقك

شكرا للتعليق