Ultimate magazine theme for WordPress.

“سارة عبد الرحمن” تحكي عن سبب قص شعرها

     كتبت: أمنية نصرالله

نشرت الفنانة الشابة “سارة عبد الرحمن” عبر صفحتها الشخصية على الفيسبوك ، انستجرام صورًا قديمة قائلة: “ذكرى من يناير ٢٠١٩”، بدأت “سارة”تحكي، الموضوع ممكن يبان عادي بس هو مش عادي.

خطوة مهمة من خلالها اتعلمت حاجات كتير عن نفسي.. كان بقالي سنة بمر بوقت مش لذيذ اوي و في لحظات ما باسرح و احلم اني في حالة كويسة.. بيجيلي كدة تخيل اني حلقت خالص و عارفة المس قفاية ب ايدي… احساس مابيمشيش من ذهني اوي.. مع دة كان بيحصل تساقط لشعري بشكل مخيف.. كتل بتطلع في ايدي كأني في فيلم رعب.

واستكملت روحت لدكتورة و قالتلي دي ضغوط الحياة و كل ماسأل حد يقول لي دة ضغط نفسي.. لحد ما جه وقت كدة حسيت فيه اني وصلت لإحساس اني مش عايزة ابقى انا.. عايزة اكون حد تاني.. شكلي نفسه ماعرفوش في المرايا، عايزة اغير اسمي.. و في نفس الوقت فيه رغبة اني عايزة اواجه وشي كدة زي ما هو.. كأن كان بقالي سنين باعمل كام حيلة عشان اخبي حاجة انا مش عايزة اواجهها.. وجهي… ماشي طيب ياللا اقص شعري خالص.. حوار بقى.. كله معترض سواء اسرة اوي شغل او صحاب.. و بالأخص و الأهم: مخي.. طلعلي كل الحاجات اللي ممكن تخوفني و توقفني عن الخطوة.” مش هايجيلك شغل، هايكون شكلك ولد و هاتفقدي انوثتك، مش هايطول تاني و هاكتئب و مافيهاش رجعة “.

طلبت من حازم راغب شبح ال فوتوشوب يحطلي شعر قصير على صورتي عشان اطمن نفسي.. مفيش تطمينة.. عشان الموضوع مش موضوع شكل اصلا.. لحد اليوم اللي المفروض اروح اقص شعري فيه.. اول ما صحيت كنت بالف في البيت و قلبي بيدق من الخوف و في نفس الوقت باتريق على نفسي عشان الموضوع واخد كل دة من تفكيري.. قعدت بالورقة و القلم افهم ايه المشكلة.. مفيش اجابة.. لحد ماقولت خلاص هاقوم البس و اروح للكوافير و لو انا في الطريق غيرت رأيي هالف و ارجع تاني.

فا في اللحظة اللي تخليت فيها عن الضغط اللي حطاه على نفسي اني ابقى تمام.. بقيت تمام.. و الاجابة جاتلي “اه ممكن يكون شكلك مش هايعجبك، و ممكن فعلا مايجيش شغل.. بس صحتك محتاجة انه يتقص.. و انتي تستحقي بداية جديدة” و دي الحاجة اللي سمعتها اللي وصلتني للحظة الفيديو دي.

اللحظة دي بالذات هي بقى كانت كل الاجابات التانية.. من أول ايه دة الموضوع بسيط.. ايه دة انا مرتاحة و حاسة اني اخف بكتير.. ايه دة انا وشي جميل.. ايه دة انا حاسة بأنوثة اكتر من الأول اصلا.. ايه دة.. فيه احساس مهم و لازم افتكره، اني اما باخد بالي من نفسي و بارضي جسمي و احتياجات صحتي.. كل حاجة تانية مابتفرقش في الآخر.. و الموضوع صعب و بيحتاج شوية تمرين عشان دي من أوائل المرات اللي خليت احتياجاتي هي الأولوية”..

الجدير بالذكر أن أول دور ظهرت سارة فيه هو في فيلم “1000 مبروك” للفنان أحمد حلمي، ثم توالت الأعمال حتى مسلسل “سابع جار” وجسدت شخصية هبة التي تألقت فيها وأحبها الجمهور، ثم بعد ذلك أحدثت ضجة في مهرجان القاهرة السينمائي في دورته ال40، وتصريحها عن لبس فستان مستعمل من وكالة البلح، وعن فكرة إعادة التدوير وإن المهرجانات السينمائية تحتاج الكثير من الفساتين.

ويذكر أن آخر أعمالها سنة 2019 الكنز 2 الفيلم ، ومن بطولة محمد سعد، ومحمد رمضان، وهند صبري، أحمد رزق، وأحمد حاتم، هيثم أحمد زكي، وأمينة خليل، وروبي، وهاني عادل، …ونخبة من الفنانين، من تأليف عبد الرحيم كمال، وإنتاج وليد صبري، إخراج شريف عرفة.

قد يعجبك ايضا

التعليقات متوقفه