Ultimate magazine theme for WordPress.

جورناليدة في حوار خاص مع الفنان “مراد فكري”

0

Get real time updates directly on you device, subscribe now.

  حوار: أمنية نصرالله

ولد مراد فكرى سنة 1981 وهو نجل الفنان فكرى صادق، تخرج من معهد السينما وشارك فى العديد من الأعمال السينمائية والدرامية منها “مجنون أميرة، الألمانى، الصيف الماضى، ابن حلال، ولاد إمبابة “.

-فى البداية كلمنا عن حياتك؟

انا مراد فكرى صادق ابن الفنان فكرى صادق كنت فى مدرسة النقراشى التجريبي منطقة حدايق القبة وأنا من سكان حدايق القبة، ويمكن هو دة اللى ساعدنى فى أدوارى بالنسبة للأدوار الشعبية لأن أنا عندي نماذج في منطقة حدايق القبة كتير جدًا قريبة من الأدوار اللى لعبتها ،أول حاجة عملتها خالص كانت البرلمان الصغير إخراج شكري أبو عميرة وكان عمرى 9 سنوات ،بعدها عملت فيلم زيارة السيد الرئيس مع الفنان محمود عبدالعزيز، إخراج منير راضي وكان عمري 11 سنة وكان أول شغل ليا وأول مشهد أصوره كان مع الأستاذ نجاح الموجي والأستاذ محمد هنيدي والأستاذ محمود عبد العزيز وعم حسن الأسمر.

-هل مراد فكري دخل التمثيل عن حب أم للدخول فى عالم الأضواء والشهرة؟

لا داخل التمثيل عن حب فمن صغر سني وأنا أشارك في مسرح المدرسة بتاعتي بالإضافة إلى وجودي في بيت فني ساعدني كتير جدًا إني أفهم يعني ايه فن يعني ايه التزام يعنى ايه مذاكرة الشغل ومعايشة الشخصية فكنت دائمًا مع والدي أثناء وجوده فى الشغل والمسارح كنت أحضر معه بروفات المسرحيات فتأسست على أيده مجموعة كبيرة من النجوم بدون قصد فمن هنا حبيت المهنة.

-كلمنا عن أفضل فنان اشتغلت معاه؟

والله اشتغلت مع فنانين كتير جدًا واتعلمت منهم كتير جدًا يعني من الفنانين اللى استمتعت في الشغل معاهم كان الزعيم عادل إمام في مسرحية بوديجرد، الأستاذ نور الشريف في مسلسل عيش أيامك، عم طلعت زكريا ،الأستاذ سيد زيان، علاء ولي الدين، عم وائل نور الله يرحمه، ياسر جلال، محمد رمضان، نضال الشافعي، خالد النبوي.

-نيجى لمسلسل “ابن حلال” احكيلنا عن أكتر موقف فاكره في التصوير؟

مسلسل “ابن حلال” كان كواليسه جميلة جدًا كنت أول مرة أشوف الممثل حمزة العيلي وأنا داخل استوديو النصر لقيته قاعد فاعتقدت إنه عابر سبيل وبالفعل عملت اللى يقدرني عليه وطلعت 100جنيه وادتهاله اتفجأت بعدها ب10دقائق إنة الممثل حمزة العيلى فاتصدمت، الموقف التاني العلقة بتاعت صرصار وحبيشة مكنتش أعرف إن محمد رمضان ساعة الشغل ممكن الجد يسيح عندة على التمثيل فقام محمد بالضرب حقيقي فحصلى دوخة ووقعت من طولي أثناء التصوير جرى رمضان عليا وفضل معايا وجابلى كمادات ثلج وأخدني في حضنه واعتذرلي.

-من رأيك إن الفنانين الذين يتعايشون مع الدور من الممكن أن يتأثروا نفسيًا؟

طبعًا لإن أخطر حاجة عند الممثل مرحلة التقمص خصوصًا لو بيتقمص دور مركب، أحيانًا لما تزيد مدة التصوير نتأثر فعليًا بالشخصية.

-طب ازاى قومت بالاستعداد لشخصية صرصار في مسلسل “ابن حلال”؟

شخصية صرصار كانت متعبة جدًا في مذاكرتها وأنا بقرأ الورق لقيت إن خلال الخمس حلقات أنا بعمل مشاكل مع حبيشة وأم حبيشة وأخت حبيشة وخناقات وضرب قلقت جدًا وكنت خايف من رد فعل الجمهور ضدي.

-طب نيجي لمسلسل “ولاد إمبابة” احكيلنا عن دورك فيه وهل كنت تتوقع نجاحة؟

جتلى شخصية ولاد إمبابة على الورق اتنين متشردين قاعدين فى الحارة أنا بصحبة محمد فاروق شيبة ففجئت المخرج بشخصية كوميدي لقيت ضحك ولقيت هزار وعجبهم الدور فقال ممدوح زكى المخرج هى فين الشخصية اللى على الورق أنت ودتني في حتة تانية ليه فمن خلال دوري في ولاد امبابة قدرت إن أتميز على مستوى ولاد إمبابة نظرًا لأنه كان فيه العديد من نجوم الكوميديا.

-ماهو المشهد الأصعب في شخصية حريقة؟

مكنش فيه مشاهد صعبة في حريقة الصعب إن احنا كملنا تصوير في شهر رمضان وكان ممكن الأوردر يوصل ل22ساعة وكان فى أيام بنبات فيها في الاستوديو.

-بتقيس نجاحك عن طريق ردود أفعال الشارع ولا السوشيال ميديا؟

عن طريقهم هما الأتنين بس بالنسبة للسوشيال ميديا أكتر لأن الناس كلها اتجهت للميديا بشكل عام.

-ما هو المخرج التى تتمنى العمل معه؟

شريف عرفه، مروان حامد.

-كلمنا عن خططك المستقبلية؟

خططتي المستقبلية إني أنجح واستمر وأحافظ على نجاحي ،وأحاول أشتغل على نفسي أكتر، وأحاول اكتسب إرضاء عدد كبير من الجمهور.

-فى انتشار ظاهرة كورونا، ماهو دور الفنان لمواجهة هذا الفيروس؟

دور الفنان إن اللى يقوله يعمله بمعنى إني أطلع لايف وأقول للناس خليكم فى البيت وتانى يوم أنزل صور وأنا مع أصحابي بعد الحظر.

قد يعجبك ايضا

اترك تعليق

يرجي التسجيل لترك تعليقك

شكرا للتعليق