Ultimate magazine theme for WordPress.

العطاء قرار .. مهندس ميكانيكا يطلق مبادرة لمساعدة الآخرين

0

 

العطاء قرار .. فى ناس بيبقى نفسها تبقى معطاءه، لكن مبتقدرش تأخذ القرار الصح وفى ناس بيبقى زى ما فادت نفسها تفيد غيرها وزى ما قدرت تحدد أهدافها وطريقها تساعد غيرها على تحديد طريقه وهدفه، احنا النهاردة بنتكلم عن شاب قرر إنه يساعد غيره ويفيده حاول إنه يهدي غيره لطريق ممكن ميكونش واضح فى ناس بيبقى نفسها تعمل مشروع تشتغل في العمل الحر، ولكن مش عارفين يعملو ايه بالظبط !! العمل الحر عبارة عن ايه، ويدخلوله منين مش عارفين.

احنا النهاردة بنتكلم عن مهندس مصري شاب اسمه محمد محسن، مهندس ميكانيكا، يبلغ من العمر 27 عامًا.

في البداية نشكرك على المبادرة الجميلة دى إن أنت تساعد غيرك وتفيد اللي حواليك ودى مش شعارات يا جماعة فى ناس كتير بتتعلم وبتوصل لمناصب كبيرة بس محدش بيستفيد منه فكون إن أنت تسخَّر علملك تساعد به الآخرين دى حاجة مهمة أنت قررت تعمل دورات مجانية، اللي عايز يشتغل في العمل الحر من خلال نتعلم 

ممكن تقولنا الفكرة جاتلك ازاى؟

الموضوع جالي بعد ما خلصت الجامعة بيبقى في تخبط كبير جدًا بعد الدراسة الواحد مش عارف يبدأ منين، ايه هي مجالات الشغل أصلًا، ازاى يدخل مجال معين، ايه المطلوب منه عشان يدخل المجال اللي عايزه، فالموضوع بيبقى صعب شوية ومبهم والواحد بيبقى تايه، الدراسة بتبقى شيء والواقع العملي شيئًا آخر خصوصًا في مجال الهندسة وبالتحديد تخصص ميكانيكا فالفروع كتير جدًا، من أبسط الأشياء إن الواحد بعد التخرج يبدأ يعمل سيرة ذاتية لنفسه “سى في” مش عارف يكتب فيه ايه فى ناس بتروح تأخذ دورة تدريبة لمعرفة كتابة ال “سى في” يا جماعة دي في حد ذاتها كارثة بكل المقاييس.

الفكرة في كتابة السيرة الذاتية إنك تعمل حاجة تخلي اللي قدامك أو صاحب الشغل يقول إن الراجل أو المهندس ده هينفعنى هيطور ويكبر من شغلي أو بمعنى آخر (اللي هو ازاى تقدم نفسك)  هو يشوف فيك انك هترفع من المكان بتاعه لأن العلاقة بتبقى متبادلة صاحب المكان عايز المكان بتاعه يكبر وانت فى نفس الوقت عايز تأخذ خبرة وتعمل اسم لنفسك.

*هل أنت مررت بذلك من قبل؟

اه طبعًا عندما بدأت أعمل “سى في” مش لاقي حاجه أكتبها قولت ال هيشغلنى هيشغلنى على ايه طيب، *طب عملت ايه ساعتها ؟ *واحده واحده بتروح تدريب في أماكن

*طب ع اساس ايه كنت بتختار الأماكن دى ؟

أماكن فيها حاجات فى التقنية “التكنيكال” حسب التخصص -مكان فيه هتعلم ازاى ادخل في مجال معين-مكان فى محاضرين متميزين هستفاد منهم من أضمن الحاجات اللي شجعتنى اتجه لعمل المحاضرات وانى أطور فيها إن فى ناس كتير شجعتنى وقالتلى تعالى ادرب واتعلم اى وقت.

*بتوصلهم ازاى يا باشمهندس؟

هو الموضوع بدأ في البداية أعمل فيديو على اليوتيوب عادي مش في دماغى حاجه أصلًا اتكلمت فيه عن مجالات العمل ببرامج التصميم الميكانيكية زى سباكة المعادن -تشكيل الصاج -الاسطمبات -السيميوليشن لاقيت الحمد لله واحد فيو كويس جدا والناس بدأت تتفاعل وعجبها فرحت جدًا لإنى مكنتش متوقع.

*ايه أكتر أسئلة بتتسألك؟

أكتر سؤال ايه العقبات اللي قابلتلك بعد ما خلصت، ازاى أدخل في مجال معين-ادرب فين فالواحد الحمد لله بعد ما اشتغل في كذا مكان جمع داتا كويسة بدأت اى حد عايز يدرب في اى مكان اقوله المكان ده كويس هتستفاد منه الناس دى كويسه عايز تأخد كورس ارشحله أماكن كويسه انا كمان أما بعمل محاضرة أو إيفنت بحب أخد فيدبالك من الناس ال بتحضر عشان أشوف انطباعهم.

*أنت بتعملهم الكلام ده كله أون لاين ؟

أون لاين وأوف لاين عملت ايفنت قبل كدا بس الفترة اللي فاتت الاونلاين الأكتر عشان مفيش تجمع وكدا، بالنسبة إنها مجانية أم بمقابل مادي فى حاجات مجانية وفى حاجات بتبقى مجرد تكلفة المكان أو اشتراك موقع.

*هو كل الحاجات اللي بتقدمها تكنيكال في مجال شغلك ولا ممكن فى تخصصات تانيه؟

هو الأكتر مجال شغلى بس كورس العمل الحر “الفرى لانسر” ال قدمته حاولت اتكلم فيه لكل التخصصات مش مقتصر بمجال هندسه بس اوميكانيكا جينرال في مجالات كتير (مجال الشبكات -الجرافيك ديزاين -مجال الميوزيك -مجال التصوير -…) مجاله واسع جدا حابب اشكر مركز كاتم تك م.عمرو سلامه من اكتر الناس ال شجعتنى ودكتور عمرو شعبان ديزاين اون لاين أكاديمي ساعدوني كتير الصراحة وطوروا من أفكاري كتير كنت بادئ بحاجة بسيطة خالص مش حاجه كبيره يعنى.

*أنت بدأت بفكرة إنك حابب تساعد غيرك لحد لما لاقيت الفكرة بتكتمل معاك؟

الحمد لله فى أكثر من موقع أجنبي طلبوا مني الكورسات اللي بعملها عندهم فالموضوع بيتطور مع الوقت *طب ايه الكورسات ال بتقدمها؟ *قدمت كورس ازاى تشتغل بالعمل الحر قدمت كورس كمان ازاى تشتغل تصميم ميكانيكى ببرنامج سوليد ووركس ده من أشهر برامج التصميم الميكانيكى بالإضافة للمحاضرات ال بعملها تانيه وشغال الفتره الجايه في كذا حاجة.

*طب ايه الأفضل بتعمل الدورات دى أون لاين ولا دورات حيه؟

والله دى ليها مميزات ودى ليها مميزات فى ناس مش بتعرف اون لاين بيبقى محتاج محاضر قدامه يسأله فى حاجات هتقف معاه لازم يكون متواجد فى نفس المكان فى جانب بقى تانى بتبقى مسافة بعيده مش هيعرف يجى وهيضيع وقت كبير في السفر بيبقى ساعتها الاون لاين احسن الفترة ال فاتت دى كدا كدا الاون لاين بقى مطلوب وشبه اجبارى فالاتنين مطلوبين.

*مين اكتر ناس مقبله على فكرتك ؟

شباب هندسة أكتر ناس تقريبًا.

*طب مفكرتش تكون فريق فى مجالات مختلفة؟

هو فعلا كل مدى الشخص فكره بيتطور بيبقى عايز يكبر الفكرة زى ما ذكرت من قبل بدأت بفكرة بسيطة والموضوع تطور بعد ذلك.

*طب شعورك ايه اول ما بدأت تعمل انترفيوهات ومكنتش بتتقبل هل كنت بتضايق وتحبط ولا دى كانت حاجه بتكون عزيمه وإصرار عندك وتديلك أمل أكتر؟

طبعًا الواحد كان بيضايق في البداية بس أنا طبيعتى بحب المعافرة الواحد يتعلم يغلط يجرب تانى لحد ما يوصل للصح كدا، الموضوع بيبقى وجهات نظر ممكن يشوفك مش لاقي الحاجه ال عايزه فيك بالرغم إنك شخص كويس، بيكون بيدور على حد بروفينشال في جزء معين وأنا شاطر في جزء تاني دي الفكرة.

*فى دوره دلوقت شباب كتير بتروحلها وهى كيف تقود فريق الدورة دى فعلا مهمة؟

خصوصًا كمان فى مجالنا لأن الموضوع بيبقى متدرج المهندس بيبقى معاه فنيين بيكون فى تدرج مدير مصنع مثلا بعده مدير انتاج بعده رئيس قسم كدا ف لازم هيبقى فى فريق يحصل بينهم تواصل وتوزيع اوردرات وازاى تطلع افضل ما فى الشخص وتنمى الحاجه ال نقصاهم.

*انت شايف محاولاتك وإصرارك ده في الفترة الصغيرة أدت لنتائج كويسة وخبره لك؟

*نعم، أكيد الواحد اكتسب خبرة في هذه الفترة وتجارب مفيدة وعلاقات مع ناس كتير، فى دول كتير بتعرف تطور من مهارات الشخص ممكن المصرى يبقى عنده المستوى العلمي المتميز بس مش عارف يبهر اللي قدامه.

ازاى الطلبة المصريين يكتسبوا المهارة دى؟

*فعلا اللبناني والسورى بيحترفوا الموضوع ده إحنا نقدر نكتسبها إن أنت دائمًا تطور من نفسك متقفش عند نقطة ثابته لازم تجرب وتفكر فى حاجات جديدة تشوف الجديد ال بينزل في مجالك من خلال الإنترنت. عشان كده إحنا بنحاول نكمل الحاجه ال نقصانا عندنا العلم والذكاء ناقصنا نستعرض مهارتنا

*طب تنصح بإيه الشباب؟

أكتر نصيحة هي إن محدش يحاول يضيع وقته ويستغله يتعلم حاجة مفيده تطور من نفسه لأن محدش هيجى يساعدك وأنت في مكانك لازم تجتهد وتسعى لتحقيق هدف أنت وضعه لنفسك.

قد يعجبك ايضا

اترك تعليق

يرجي التسجيل لترك تعليقك

شكرا للتعليق